Пришти бабки Анці - 4

Аркадій Шиншинов 20.10.2018 15:03 ДОЗВІЛЛЯ

Бабка Анця і мотокосарка.

— Слава Йсусу Христу!

— Слава й навікы… А та йсе ты, Аркашику! Коли сь прийшов? — бабка Анця бодро шкутильгала по дорозі з косою на плечі. З її маленьким ростом в чорному вбранні і чорній хустині вона вигляділа як Смерть-ліліпут.

— Перше, бабко.

— Нно, най ти даст буг серенчі, а коли йдеш гет?

— За три дны.

— Пак мамці поможеш ріпу выбрати, та дале. А я йду отаву скосити. А што вы тото робите?

— Газонокосилку правиме.

— Но та не аби вам пес на груші сидів гі Андрійови Терчиному.

— Тото як?

— Но, чуй, вун тоже купив таку сінокосілку з мотором, на бендзинови. Така що і сама ся везе і сама сіно косит. Купив та лежит пуд сливов. Люди косити ідут зрана, а вун ся сміє, каже — я тото што ви за цілий динь — за пучас покошу. Но пучас не пучас, ай прийшов ід ньому кум Мигаль, тай начали тоту косілку заводити. Чуй, тото куй загарчит, та куй скочит на тих колесах, та як побіжит по дворови, а Андрійцьо ся за ниї держит та гойкат — люди імняйте ня!

Но, чуй, біда. Моторкосілка по дворови бігат, кури сперед нив, а ззаду Андрій імився та не годен тото, до фраса, сперти. А мотор не аж гайлує. Такої біды наробив у дворі, що, чуй, онь саракий пес ся спудив та з ланцом тай кучов утік.

Айбо тот мотор не став, ай уломив плут, та у города, чуй, гет їм фасолю понищив, а дале у сусідського плота, та кумови Мигальови у сад, а там яблоньки малі, но які малі, уже як три персти, мали уже і яблока сього году быти, білый налив, Мигаль з Україны привюз… Та обісь знав — тот мотор усі до одного скосив. До невої. Та дале городами, через заверб, а імили го аж на Дубниках, бо там розкіряв коровы, та упав у мочарь. Мигаль пак гет сокыров тото побив…

А, чуй, Андрій дома дивит, а пса ниє. Та не аж гойкат — Бондію, Бондіку! Ай чує — гавкат пес, з города гавкат. Прийде там, а пуд грушов куча псова, а сам пес, сарака, на туй груши сидит, та не годен злізти. Так ся, сигінь, того мотора напудив…

Та дився, аби і вам пес на грушу не втік. Но, ай мушу бігти…

І бабка Анця почимчикувала дале.

Аркадій Шиншинов

ТЕГИ : Пришти бабки Анці

Коментарі :


Додати коментар

 

 

 

Погода

Оголошення

Архів новин

Влада

Чи влаштовує вас влада в Україні?


Влаштовує
Не влаштовує
Мені однаково


Голосувати/результат